Lexame SC/HSC

[pirbhay]

Fer li isi-mem


Li byen revoltan seki finn pase lor internet pu lexame HSC (pu bann dimunn ki ti krwar ki Cambridge enn top). Me pu bann dimunn pu ki sa zafer-la pa enn nuvo zistwar, zot truv sa enn degu ki nu ankor pe fye lor Cambridge.

Avan bann etidian ki ti ena kapasite ti pe servi bann mwayen kuma telefonn ek fax pu kominik avek bann etidian etranze. Me aster avek internet, li kut byen bon-marse ek tu dimunn fasil gagn akse.

Parmi bann opsyon ki pe propoze pu « repar » sa erer-la, refer lexame. Li normal, si ena pu refer, lexame-la pu bizen san okenn fre parski li lerer Cambridge. Me refer lexame li pa enn bon solisyon parski sa pu ena enn lefe byen negatif lor performans bann zelev, mem si refer zis bann size kot finn ena fwit. Sa pu kre enn veritab fristrasyon ek stres kot enn zelev ki ti pu reponn enn kestyon byen, li kapav fer erer.

Kan enn zelev fini fer so lexame HSC, li sorti avek enn surir. Li nepli anvi pans lexame-la. Li sulaze. Aster si nu ena pu fer enn rewind ek replay, alor imazinn sa kosmar dan nu bann zelev pu pase !

Solisyon ki pu kre mwens dega, trak bann fwit ek anil sa bann kestyon-la. Me la-osi, ena enn lot problem. Ki garanti ena ki sa bann fwit-la pa finn pas zis lor facebook? Ek si ena bann zelev finn esanz bann kestyon-repons par imel, li inposib pu trake! Sa fer nu panse ki li posib ki bann lane presedan, bann etidyan finn kapav esanz bann kestyon-repons par imel ek lezot forom.

Nu bizen met enn term lor tu bann depandans ki nu ena, kot nu kapav fer li. Li pa normal ki apre 40an lindepandans, nu pe bizen fye lor enn liniversite dan Angleter ki kumadir enn paswar, pu prepar nu lexame SC ek HSC. Liniversite Moris par exanp, kapav prepar sa de lexame-la. Akademikman Morisyen byen kale. Inn ler pu aret res dan angle zot lake !

Fer li isi-mem, bann papye lexame-la pu kut buku fwa pli bon-marse konpare avek Cambridge, li pu abordab pu tu dimunn ek nu pu pli sir ki pa pu ena fwit. Si liniversite Moris prepar sa de lexame-la, sertifika SC ek HSC pu bizin rekonet antye lemond. Eski pa bann Lecturer Morisyen ki prepar papye-lexame dan UoM? Si sa nivo-la so papye nu kapav prepar li isi-mem, kifer pa SC ek HSC !

An pasan bann profeser morisyen mem ki prepar nu mock exams dezyem-term (ki buku fwa pli difisil ki Cambridge).

Ninport ki solisyon zot rode pu sa-lane-la, bizin fer sir ki dan lavenir enn tel zafer pa repete. Li pa enn « tricherie » me enn fwit informasyon, enn iresponsabilite liniversite Cambridge.

Tahir Hussen Pirbhay
www.pirbhay.com
tahir.pirbhay@gmail.com

[sheen]

Au moins gouvernement, Cambridge, MES... aussi kapav koné c koi d'avoir la "peur" au ventre pour gaffe ki fine arrivé (et ki fine sann fois-la à la lumiere du jour).

Comprend l'effet ki représente l'examens HSC pour bann étudiants ki fine arriv à l'apothéose de zot études, pour l'importance ki sa représenté pour de simples adolescents.

Malheureusement mo reste aussi sceptique lor "solisyon" pou prepare papier SC/HSC à Moris. Pa blié ki a Moris, "mo papa so couzine so bo-frere so ma-tante..... " touzour tombe ene fami laliane ki kapav rend nou ene ti service(...)